திருகோணமலையில் எண்ணெய் தாங்கிகளை மீள் அபிவிருத்தி செய்வதற்கு IOC 183 மில்லியன் டொலர்களை முதலீடு செய்கிறது

இந்தியன் ஒயில் கோர்ப்பரேஷன் (ஐஓசி) சுமார் 183 மில்லியன் டொலர் முதலீட்டில் திருகோணமலை எரிபொருள் சேமிப்புத் தாங்கிகளை மீள் அபிவிருத்தி செய்யத் திட்டமிட்டுள்ளதுடன், அடுத்த மூன்று மாதங்களில் ஒப்பந்தம் கைச்சாத்திடப்படும் என இந்திய ஊடகங்கள் செய்தி வெளியிட்டுள்ளன.

அறிக்கைகளின்படி, இந்த ஒப்பந்தத்தில் 49% பங்குகளை எடுக்கும் IOC, 15,000 மில்லியன் இந்திய ரூபாய்களை அதாவது 183 மில்லியன் அமெரிக்க டொலர்கள்  முதலீட்டில் திருகோணமலை எரிபொருள் தாங்கிகளை மீண்டும் அபிவிருத்தி செய்ய இலங்கை அதிகாரிகளுடன் பேச்சுவார்த்தை நடத்தி வருகிறது.

இந்த ஒப்பந்தத்தில் மீதமுள்ள 51% பங்குகள் இலங்கை பெட்ரோலியம்  கூட்டுத்தாபனத்தின் (CPC) வசம் இருக்கும்.

ஜனவரி 2022 இல், LIOC, CPC மற்றும் இலங்கை அரசாங்கம் திருகோணமலை எண்ணெய் தொட்டி வளாகத்தின் கூட்டு அபிவிருத்திக்காக மூன்று குத்தகை ஒப்பந்தங்களில் கையெழுத்திட்டன.

கடந்த வருடம் கைச்சாத்திடப்பட்ட உடன்படிக்கையின் பிரகாரம் LIOC கட்டுப்பாட்டில் உள்ள 14 எண்ணெய் தாங்கிகளின் குத்தகை மேலும் 50 வருடங்களுக்கு நீடிக்கப்பட்டுள்ளதுடன், 24 எண்ணெய் தாங்கிகள் எண்ணெய் கூட்டுத்தாபனத்தினால் சுயாதீனமாக அபிவிருத்தி செய்யப்பட உள்ளது.